بالبداية بدنا نطمن جميع المواطنين السوريين إنو نحنا بأمان لحد الان من فايروس كورونا وما تم تسجيل أي إصابة بسوريا والسبب إنو مناطق الإصابة بعيدة جغرافياً عنا .
الإصابات تسجلت بالصين واليابان وكوريا الجنوبية وتايلاند وتم تسجل حالة واحدة بالولايات المتحدة الأميركية والشخص المصاب كان سابقاً موجود بمدينة ووهان الصينية يلي تعتبر مركز إنتشار الفايروس .
يوم الأربعاء بتاريخ 22/1/2020 عقدت منظمة الصحة العالمية إجتماع لتحديد ما إذا كان ينبغي إعلان حالة طوارئ صحية عالمية بعد ظهور الفايروس؛ لكن إعلان حالة الطوارئ تأجل لأنو الإجرائات يلي عم تتبعها الصين كافية لتحد من إنتشار الفايروس .
وبعد الإطمئنان صار فينا نتعرف على فايروس الكورونا أكتر ونعرف كيف نحمي حالنا قدر الإمكان بداعي الحيطة والحذر
🔴 تم إكتشاف الفايروس لأول مرة بالمملكة العربية السعودية بعام 2012 وتم تسميته بمتلازمة الشرق الأوسط التنفسية ، أما الفايروس يلي بدأ ينتشر حديثاً أطلق عليه اسم فايروس كورونا المستجد
🔴 فيروسات كورونا هي فصيلة كبيرة من الفيروسات يلي بتسبب مجموعة من الأمراض بتتراوح بين نزلة البرد الشائعة والمتلازمة التنفسية الحادة الوخيمة (سارس) .
🔴 فايروس كورونا يعتبر حيواني المصدر يعني بينتقل من الحيوان للبشر ، منشأ الفايروس مو مفهوم بشكل تام لحد الآن لكن حسب تحليل مختلف جينومات الفيروس يعتقد أنو منشأه الخفافيش و إنتقل إلى الجمال بطريقة ما ، أما السلالة يلي عم تنتشر حالياً يرجح إنو مصدرها حيوانات بحرية ، بالإضافة لأنو بينتقل بين البشر نتيجة إستنشاق الرذاذ التنفسي من المريض والتماس المباشر ، وتم إثبات إصابة عدد من العاملين بالمجال الصحي عن طريق العدوى من المرضى .
🔴 أعراض الإصابة بالكورونا بتشمل التالي : حمى وسعال ، ضيق وصعوبة بالتنفس ، احتقان بالحلق أو الأنف ، صداع شديد و ببعض الحالات بيتطور لأعراض تنفسية حادة قد تؤدي للوفاة متل الفشل التنفسي لكن هي الأعراض مابتعني أنو الشخص مصاب بالكورونا لأنها أعراض ممكن تنوجد عند شخص مصاب بنزلة برد مثلاً !
🔴 تأكيد الإصابة بالكورونا بكون عن طريق عدة إختبارات متل عزل السوائل والفحص بالمجهر الإلكتروني ، إختبارات مصلية
وتقنية تفاعل البوليميراز المتسلسل .
🔴 لحد الآن مافي علاج نوعي للفايروس أو حتى لقاح ، و الأدوية المستخدمة هي مساندة بهدف خفض درجة حرارة المريض وتسهيل عملية التنفس
🔴 للوقاية لازم نلتزم بالإرشادات التالية : تجنب ملامسة مفرزات المريض التنفسية والأسطح الملوثة ، عدم إستخدام
أغراض المريض الشخصية متل الألحفة و الوسادات ، غسل اليدين جيداً لمدة مابتقل عن دقيقة بالماء والصابون .
◾ منصة الصحة الطبية السورية
◾ ميدوز خمجية
◾ الصيدلانية بشرى ناصر
◾ المصدر : منظمة الصحة العالمية WHO
Discussion about this post